MC Bruddaal uffm Rad en Stockholm
Category: Allgemein, Bruddaaler Stuttgart Pedelec Blog

Stockholm

I war en Stockholm weil I da beim Stockholm Halbmarathon mitgmacht han. Wer gern bei so ebbes mitläuft dem kann I des echt empfähla! Des isch subber organisiert. Da sen ca. 15.000 Läufer ond davon angeblich 300 aus Deutschland. M’r läuft emmer am Wasser entlang, erscht über Norrmalm ond dann noh uff Södermalm. Dahanna isch die Karte vom Lauf: Karte Stockholm Halbmarathon.

Dann waret m’r noh gemütlich en Stockholm was nach Stuttgart mei Lieblingsstadt isch… wahrscheinlich weils au mit S-T- anfängt.

Da des dahanna au om Gebbel gaht sei folgendes gesagt: Mir isch uffgf’alla dass die en Stockholm echt schnell Radwege hingm’acht hen. Die waret davor no ned da. En Stockholm gibts au a City Maut sodaß mr en d’r Stadt ned des Gfühl hot dass des da subber voll isch.

Außerdem gibts viele verschiedene Leihrad Angebote. Zumindescht han I drei konkret gsäha. Unsere Räder gabs an verschiedene Stationa. M’r kauft vorher a Karte ond dann kann mr entweder 3 Tage fahra oder d’r ganze Sommer.

Leih-Fahrrad in Stockholm

Leih-Fahrrad in Stockholm

Mei Pedelec isch hee ganga

Z’rück in Stuttgart ben I wieder uf mei geliebtes Pedelec g’sässa ond ben glei wieder ens Gschäfft g’fahra. Dann letzschta Sonntag wollt I wieder losfahra ond dann war ebbes komisch. Des hot voll gwackelt am Tretlager. I han des Rad omdräht ond neigschaut ond da war d’r Teil wo d’r Motor dran hängt durchbrocha (en dr Midde) … Jonger Vadder han I da dacht!

Brose Motor

Brose Motor

Scheiße was machsch jetzt… des Fahrrad isch ned amol a halbes Jahr alt ond jetzt des. Also ben I zom Bike Sport am Mariaplatz g’rollt ond han scho bissle Bauchschmerza ghett. I fang so an zom erzähla ond der woiß scho was los isch als I sag’s wackelt. Kriegsch a neis Rad… ond I so echt jetzt. Offensichtlich han I a Charge abkriegt wo des Teil ned stark gnug baut worda isch ond danach hen die von Spezialized des da verstärkt. I bekomm also s’gleiche Bike bloß verbessert an der Stelle. Da muss I jetzt saga dass I echt froh bin des da kauft zu han ond ned bei soma Riesa Lada wo mr koin persönlicha Ansprechpartner hot. Danke!

Sobald I wieder uffm Gebbel sitz mach I a Foddo vom Schwobablitz!

Am Samstag ben I bei d’r Hausemesse Paul Lange & Co. OHG

Die Tage isch Hausmesse bei Paul Lange & Co. OHG . I ben da mit meim Bonanzarad am Samstag 29.09. om 11 Uhr da ond schau amol nachm Radhelm!